Mihringte hian kan damchhung nun hi eng nge a nih tih pawh ngaihtuah lem lovin tam tak chuan kan hmang liam mai mai a. A thenin an damchhung hun rei lo te chu thil tha tihnan leh mite tanpui nana an hmanhlel laiin, a tam zawk hi chuan chhutiang lam chu kan ngaihtuah vak ngai lem lo. Mi thenkhat chuan damchhung mai ni lo, he khawvel an chhuahsan hnu thleng a mite rilru leh thinlung a riak reng tawh tur thil an ti a, hming ropui tak an chher laiin, a tam zawk hi chuan kan damchhung tawi te ah pawh hming thatna khum lovin, zahawmna thlengin kan hlauh thin.
Tumah mahni maiin kan awm thei lova, a huho va cheng a intanpui dial dial tura siam kan ni. Kan tihtheih leh hriat te inchen mah suh se, kan inmamawh tawn theuh a. Kan Mizo thufing ah pawh , “ Lungpui pawh lungtein a kamki loh chuan a awm thei lo” tih te leh thil dang tam tam tak kan nei. History kan chhiar chuan mi ropui tak tak te leh an thil tih te kan hre thin. Khang zawng zawng kha mi fing leh thahnem ngai te inpekna liau liau a ni a. Chung mi te chu an dam chhungin ropui takin an leng a, an thihhnu ah pawh mi te rilru ah hmun an chang reng tawh thin.
Khawvel ah hian vawikhat bak kan piang dawn lova, mite tan a thil tha tih te, mahni mihring pui hmangaih te hi kan tih tur a ni. Kum hlun tur tumah kan awm lo, nun hi uluk tak a kan hman a ngai a ni. Pathian thuhriltu ropui tak tak te , lehkha ziaktu hmingthang-te leh mi te tana thil tha titu te hi chu an boral pawhin mite thinlungah an cheng reng thin. English poet ropui tak Ben Johnson-a chuan a hla pakhat, “ The Noble Nature “ ah chuan thil tha tih hlut zia mawi takin tiang hian a lo phuah a-
It is not growing like a tree,
In bulk, doth make man better be;
Or, standing long an Oak, three hundred years,
To fall a long at last, dry, bald and sere.
A lily of a day
Is fairer in May
Although it fall and die that night-
It was the plant and flower of light.
In small proportions we just beauties see;
And in short measures life may perfect be
.
Kan dam rei avang ngawtin kan ropui lova, ngaihsan kan hlawh na hek lo. Oak thing chu kum za thum hial dam thei mahse, a tawpah a hnah tlakawlin a hrinna a hlauh a, thingtum hnawk sak tak a ni mai thin. A leh lamah chuan lily chu ni khat lek par mahse, pangpar mawi tak a ni a, mi te rilru ah hlimna leh lawmna a pe a, Oak aiin dam rei lo mahse mi te ngaihnat leh lawm a hlawh a. Nipui thaw tirah mawi takin a lo par thin.
Mi tute mai pawh hian kan damchhungin mi te hriat hlawh leh mi ropui nih kan duh vek ka ring. Mahse mi zawng zawngin kan nei thei si lo. Hei hi rim tak a thawh chhuah tur a ni tih kan theihnghilh leh thin. Hmingthatna hi thawh chhuah ngei tur a ni a, zahawmna hi hlauh miah loh tur a ni. Robindranath Tagore chuan “ Nunna hi nipui pangpar te angin mawi se la, thihna pawh hi favang lai thing hnahte angin “ a lo ti a. Aw!... hringnun hi hetiangin mawi se chu khawvel hi a va nuam dawn em!
Bible-ah chuan “ I nunna chu enge ni? Chhum rei lo te lo lang a ral leh ta mai thin ang hi a ni ’’ tih Jacob-a 4:16 –ah kan hmu a. Hei hian mihring nun derdep zia leh tawi zia chiang takin min hrilh. Hman tlak loh nun chu hma taka thi ang a nih dawn chu. Mi tumahin kan thih hun tur kan hre lo va, tunah hian mite tan a thil tha tih duhna thinlung kan neih phawt chuan, kan awm hmun atang pawh hian mi te tan malsawmna kan ni thei reng a ni. Mite tana thil tha ti mi chuan a duh reng vang leh phut chhuah ni lovin, hmingthatna leh chawimawina a khum a, a taksa leiah phum a nih hnu ah pawh ropui takin a nung dawn a ni.
Mi pangai khaw eng thlir phak chin chuan kan damchhungin chhungkua, khawtlang leh ram tan mi tangkai leh chhenfakawm nih kan duh theuh ka ring thin. Kan damchhung nun chu a tawi emaw a sei emaw mi te chuan kan thil tih ah min theh fo zawk dawn a lo ni. Chuvangin, “ Dam rei leh rei loh ai chuan dam chhung nun hman dan hi a ngaihpawimawh awm zawk ‘’ Abraham Lincoln te, Simon Bolivar te, Sir Winston Churchill te, Mother Teresa te chuan khawvel hi chhuahsan tawh mahse theihnghilh theih an ni tawh lo a. Chutiangin English literature tiropui tu ber William Shakespeare te hla phuah thiam ropui nun tawi, John Keats a te bakah mi dang tam tak khawvel hriat reng tawh tur te an awm. Zofa te zingah ngei pawh mizo hnam kan ral hma loh a hming dai tawh ngai lo tur, hnam rohlu kan nei ve ta nual mai. A va lawmawm tak em!
Khawvel ah hian tumah ropui sain kan piang lova, kan intiropui chawp mai a ni. Thlahtu nu leh pa atang reng a chhungkaw zahawm leh ropui chu an awm na meuh mai, mahse chu lam erawh a kawk ber lo. Kan nu leh pate chu eng ang pawhin lo hausain ropui mah se thi ve thei tho an ni. An tel lova khawvel hi a nihna anga hmachhawn hun kan la nei dawn, mahni pawh intanpui thei lo i nih chuan mi te tan i tangkai thei ngai lo vang.
Zirna lamah pawh lehkha thiam nih a, officer nih ngawt kha zahawmna a ni chuang lo. Kan nun hi kan uluk tur a ni a, thil ho te te atang hian kan nun hi kan siam tha tur a ni. Mite zing a awm dan mawi leh nun dan tha te zir tur a ni a, kan awmna apiangah hmantlak ni turin kei mahni kan inenfiah fo tur a ni. Mi chu lehkha thiam officer lian tak pawh ni se, hman leh chhawrna a awm loh a, a ram leh hnam , khawtlang leh a mihring pui te chungah thil tha tih duhna a neih chuan si loh chuan, englai mahin mite rilru leh thinlungah lawm leh hriat a hlawh tak tak ngai lo. Heng mite hi an khawngaihthlak a, khawvel an chhuahsan rualin an hming leh ropui ni a an inhriat ve na te nen lamin zankhat mumang ang lekin boruak ah a zam ral nghal thin.
He hringnun khawvel hi mi tumahin kan zawh tawp hun tur kan hre lova, kan cham chhung a mi tana thil tha kan tih ve theih te chu tun atang hian tih nghal a fuh ber fo vang. I nun hman tawh dan te chhut kir la, mite tan malsawmna nge i nih thin a, rilru hliamtu tih te ngaihtuah rawh. Hringnun hi thlirlet loh chuan hriat thiam theih a ni ngai lo. I khawvel zinkawng a tawp hun pawh a mi te rilru a eng ang a hriat nge i duh tih te ngaihtuah la, a tihlawhtling thei turin hringnun hi fimkhur takin zawh tum ang che. Tun hi kan vai atan hun tha chu a ni si a.
