PHAWNGPUI TLANG

Kum 1999 ramtuk thla boruak vawt vur mai hnuaiah Phawngpui tlang-ah hian zan hnih riakin thiante nen kan kal a. A vawt bawk a hei hi meizial ka zukna hmasa ber a ni awm e! Tlang mawi leh thengthaw nuam tak, rápawm zet mai a ni a. 'Phawngpui' tih hi Lai tawng a ni a, Lusei tawng chuan 'phûlpui' emaw 'phûl hmun zau tak' tihna a ni. Sapho khan Blue mountain (tlang paw ruai) an lo ti bawk a, thil entur a awm nual a kal a manhla khawp mai.Hmun pawimawh thenkhat te chu: Thlazuang kam, Tialpari puk, Farpak, Hrangalha sam khuihna te an ni. Thlazuang kham hi a sang khawp mai. Thli a tam bawk a kawr leh romal te hi chu a vawm thlak theih loh. Tin, kham bul velah hian ram pangpar mawi tak tak a tam hle. Kham chhakah hian a kal tawh phawtin a an sawi thin Fakpak a awm a. Phûl zau tak, thâng nem (hnim chi khat nêl thip thep) in a bawm khat chuai mai!. Phawngpui tlang zau zawng hi sgkm. 50 vel a ni a, ft. 7100 laia sang a ni.

 ‎'Farpak' hming lo chhuah dan chu tiang hian an sawi thin: Pi leh pu te hun atang tawh khan tlang lian leh li thuk deuh te chuan anmahni chenchilhtu thlarau / huai nei vekin an ring thin a. Phawngpui tlang-ah hian ramhuai Lalpa a hming Sangaua a awm an ti. Fapa fel tak a nei a. A chhak lawk Burma ram tlang sang leh sei tak Cheriang tlang-ah khian Cheriang tlang huai lal fanu hmeltha em em mai a awm a. Sangaua fapa chuan Cheriang tlang lal fanu chu a rim thin a. An lo inngaizawng ta a, a tawpah an innei ta hial a. Lal fanu man-ah Phawngpui tlang huai chuan hauhuk tuak khat Cheriang tlang lal hnenah a pe a. Cheriang tlang lal chuan fâr (pine) kung khat a fanu a chhawmtir ve a. Kum tam tak chu tuna Fârpak an tih ah hian fâr kung khat chauh a awm a. Chuvangin Fâr park (fâr mal dinna) tiin hming a pu thlen ta a ni an ti.

                                                                   Farpak 

                                                                Chhawkhlei par

                                                                Thlazuang kham
(NB: Ka kal ve hun lai a ka thlalak te chu ka tibo zo tawh a, ka ui khawp mai. Thlalak ka dah hi chu internet atang a ka lak mai mai a ni tawh.)

RIHDIL THLALAK

RIH DIL : mitthi thlarauin mitthi khua a panna kawng a,  paltlang ngei ngei ni a  pi leh  puten an hriat chu thlasik ni eng siar hnuai ah ke ngatin kan hel a. Tlang bawm romei te chu a mawiin , a ram boruak hrim hrim hian lung a tileng kher mai!

Dil chu a lo mawi viau mai a!...

Hei hi a chhak zu dawr atanga a lan dan ...

Rih ram luah Golden Jubilee lungphun – Feb ni 5, 1942-ah Rilh ram hi luah tan a ni a, ni 5 April 1992 ah kum 50 a tlinna champha hriat reng nan he lung hi an phun a ni.

Chawngchilhi lim – mizo thawnthu a rulpui fa pai kha! En ve ngei kan duh a vangin km. 2 dawn let lam nen kein kan kal.

THLANPUI

A chung a thlalak ka vawm bei hi, thlanpui thlalak a ni a. Chuan thlalak pahnihna a thlan kotlang a, puan var a tuam khi ruhro an lakchhuah a ni a. Mi ruang dang an dah leh hnuin ruhro hi a chung lamah an dah leh thin. Hetiang hian Mizoram khaw thenkhat ah chuan thlan an la siam a, an chhungte boral an awm a piangin thlan hlui kha an hai a, an indah lut leh mai thin. Hei hi thatna tam tak a awm a, hun leh tha a hek lo a, tin thlanmual ram khat hma lutuk tur nasa takin a veng thei bawk. A leh lamah chuan thlan hawn reng hi hriselna lam atan a pawi thei mai thei bawk. Mi ten chhe deuh leh rimche tuar chak deuh tan lo chuan tlawmngaih chhuah pawh thil harsa tak a ni ngei ang.

Thubeh: Kan la thiin kan la inphum zel dawn a, hetiang a thlan siam a mitthi dang an awm apiang a hawn a inphum leh mai hi a tha a ngem? Thlanmual ram hi a khat chak nasa mai si a, tun ang reng a kan kal zel chuan hmun ruakin min daih lo thuai ang a, inphum turin hla tak tak pan a la ngai dawn a ni. Inphum dan tha leh hautak lo deuh zawk kan ngaihtuah chhuah vat a ngai.

TLAIBERH NOTE

Ramtuk thla a ral ang a,vau thla a lo thleng thuai dawn; leipui leh lo hal tih vel a lo hun ang a. Hetih hun lai hi sava no neih hun lai a ni a, mitin i fimkhur tlang teh ang u. Awmze nei lo va ram kan tih kan chiam thin a vangin, sava mawi tak tak te kha an bo zo ta!