KA RAMVAK (A ropui lo!)

Mizoram chim lam khaw lar ve tak Saiha atanga km 19-a hla Bualpui (Ng) khua-ah ka piang a. Ka tet deuh lai chuan ram chhuah leh lui kal tih vel hrat ve tak ka ni. Zirna avangin pawl sarih ka zawh hnuin Lunglei lamah ka awm a, High shool ka zawh hnuin Aizawl lamah ka insuan phei leh a. Mahni khuah tak chuan ka awm rei lo khawp mai. Ka haw khát bawk a, ka haw ve chang chuan ram ka vak ve zeuh zeuh thin a, nuam ka ti thin khawp mai. Thian nei lem lovin ram hla tak takah chawfun nen ka ram chhuak fo va engmah han kah loh pawhin ramngaw hnuaia tei mai mai kha nuam ka ti thin. Kum 2010  March thla khan khaw lamah ka haw a, tihtur a awm vak lo bawk a, inrinni tuk khat chu chawfun lian tawk tak nen Namtawngpil ram Lungsekawt lamah elhbun phir nen Zawng kah tur a awm takin, tiin ka ram chhuak a.

Khaw lamah awm lohna a lo rei a, chu lai ram chu a hma lawka an lo neihna (chul) a lo ni a, a reh duh khawp mai. Lungsekawt tláng ka then chuan Thanghlira thinzai phur ka tawk a. Ani hi an in sakna tur thingzai thiarin a lo riak a, phurh zawh hman loh a hlauh avangin Sunday hman a  tum a lo ni. Ram chinchang ka hre vak lo bawk a, ram vahna tur te ka zawt a. Tichuan, Zawng an awm takin ka tia, lo vau-a luikawr chu zawh thlak ka tum a. Rinai takin a pang a lo chhia a, vawi khat phei chu ka lum lo chauh a ni. Chhawl a ro rip rep tawh nen ram vak e ti lo chuan ka ri thla rawk rawk zel a ni ber a, sa pawh awm se an kal bo hman zel ang! Ka chhuk zel a, kawr chu a lo zau ve tial tial a, tui erawh a tlem khawp mai. Tui chu ka tuithawl khat chun ka’n thal a, ka han in a, hah a dam sawng sawng a. Luikamah chuan kawhtebel kung hnih rah bawr tha deuh a lo awm kher a, ka lak hnu chuan ka ip  chu a puar tha duh khawp mai.

Sawi angin chu lai ram chu a chheng chhe em em a, hmun danga han kalna vakna a awm lova, bakah ram ka hre vak lo bawk nen lui chu ka zawh thla zel a. Nakinah chuan saza hnu thar, a tui daina pawh la hul lo, huh deuh dap hi ka hmu a, thawm dim a har bawk sia ka phawk a nih ka ring a. A hnu han chhui a har bawk si, lui chu ka zawh thla leh ta ringawt a. Ram vak ve si lui dung zawh reng rengin ka kal ka kal a. Thui fe ka kal hnu chuan kham sang deuh mai, han helna mai tur a awm lo a lo awm a, hmunphiah a tam bawk si tlem a tlemah ka pen liam tep maw le! Tun hnua ka ngaihtuah chhuah chang apiang hian ka la tim uai uai thei nia maw le! Hetih lai hian dar 1 a ri tawh a, eng tia thui nge ka chhuk tawh pawh ka hre thei lo. Chaw ei phawt a, ramngaw lama luh a, zawi zawia vah chhoh ka tum ta a.

Chawi ka ei hnu chuan thui lo te lui chu ka zawh chho leh a, ramngaw lamah chuan ka lut ta a. Chhawl a ro bawk a, vawn tur a awm vak lo bawk nen a chang chuan ka tawlh thla leh hawn hawn thin. Ka tum dan chuan a la hma bawk a, zawi muanga chhoh a, lo eng emaw ber pawh ka tum a. Ka silai pawh chu hnawksak tih chang a tam mai, a paina hrui chhing tawkin ka suih a, ka pai ta daih a. A aiah ka chem ka phawrh ve thung a, hruizik ka hmuh remchan deuh te chu ka kheh zel bawk a. Ka lo chhuk thui hle a ni ang, lo reng reng ka pawh thei ta hlek lo mai! Ram chin ka hre bawk si lo va, mang a ang ru riau mai. Ramngaw chu a thim tan ta hle mai a, sava riak tur thawm hriat tur a awm deuh reng bawk a. Ka chau deuh tawh bawk nen, ka thu chawl ta ngawt a.

Ka chawlh chhung chuan ka kal dan tur ka ngaihtuah a, a tawpah chuan mual tlang hriam lam zelah kal ila; thingah te ka lawn chuan lo chul eng emaw ber chu a hmuh theih ka ring a. Tichuan, ka theih anga chakin ka kal leh ta a, ramngawa ka  awm laia khuain min thim hnan vaih chuan ka buai nasa dawn tih ka hre sa, hmehen ka nei bawk si lo. Rilruin ar bo a zawng tak meuh a ni! Tlak lam ram hi ka lo hre ngai lo va, ka tet laia lo kan riah tuma ka pa thu sawi “tlaklam ramah chuan ni a tlak rualin khua a thim thin” a tih chu ka hre chhuak ve ta chiah a! Thil hriat chhuah nuam tak chu a ni lo. A changin ka tlu a, ka kal tawhna lamah chuan ka tawlh thla leh vak thin. Ka silai chu tihpuah palh ka hlau bawk si, a mu phawrh ngawt chu ka duh bik si lo. Ka chem chu ka ipteah ka dah a, silai chu ka keng leh ta zawk a.

Ramngaw chu a thim tial tial a; chutih lai chuan buarachawm sava hi ka hmaah a tlan zai zai a, chauh tawh nak alaiin man ka han tum a, a theih awzawng lo mai a. Ka thinrim chuan tin pawh tin tha lovin musepin ka phuh ta thawt mai a! Ka han chhar chu a lo chip nuaih mai a, a thau tehreng nen lak tlak a awm lo khawp mai. Ka ip-ah dah ka han tum a, ka chem a awm ta miah lo mai. Awmna chin mumal pawh hriat theih loh laia chem leh zel a han bo chu mang a ang tak zet a ni. Ka kalna ngaiah  chuan ka let leh a, in dung chen pawh ka la kal hman lo vang tihah chuan chhawl karah a fawng lo lang chu ka hmu a, rilru a nuam huai mai. Mahse, ka hawna tur bawk chu rilruah a lo lang leh lo thei lo va, a tawpah chuan a tul phawt chuan chawfun a la awm bawk a, khawi lai thingbul rem deuhah emaw ka riak mai ang tiin rilru ka siam a. Ngaw chu a thiam  mup tawh avangin thui a hmuh theih tawh lova. Vawikhat phei chu Buangro rual riak tur hi ka va thawng tho thut mai a, sava rual thlabar hlau em em mai ngaw thim deuh mup kara han hram chu sava mai mai mah nih se hriat a nuam lo khawp mai!

Khua a thim fel a. Thim zingah chuan ka kal zel a, thian nei lova ka lo kal ta kher kher chu ka inchhir rum rum a. Kal pahin ka tawngtai a, rilruah a lut mawh khawp mai. A tawpah chuan  kawngte reuh te hlui zet mai hi ka va pawh ta hlawl mai a, thla a va han muang tak em! Ka thu chawt a, ka tui pai ka phawrh a; thaw huam huam chungin ka in bawrh bawrh a. Kawng chu ka zawh chhoh zel chuan lo a pawh ngei ngei ka ring a. Minute 10 vel ka chawlh hnu chuan thla a lo chhuak a, harsa lutuk lovin kalna ka hmuh thei ta a, zawi muangin kawng chu ka zawh chho a. Fingkhat emaw lek ka kal hnu chuan lo chul hi ka va pawh a, thla eng hnuaiah chul reh ruih maiah chun ka chho zel a. Lo pathum vel ka kalpel hnu chuan ka chhohna lam tur ni lo pakhatah chuan mei eng ka hmu a, mihring an awm chu ring mah ila thla a muang tak tak thei lo, ding meuhin ka thlir a, thawm a awm bawk si lo.

Ka silai chu hmet per mai thei turin ka inring a, mei eng lo chhuahna lam chu thawm nei miah lovin ka pan ta a. Pen sawmhnih leka buk ka hnaih hnu chuan, ring deuh maiin “tunge buk chhungah awm” ka han ti a, buk atang chuan “keimah Thanga, min va han tiphu nasa ve.  Zira, i haw daih tawh emaw ka ti a sin, I va tlai ve” tih leh buk atang chhuah chu a rual a. Eee… nangmah i ni maw, midang daih i nih ka ring a ka tia. Bukah chuan chawl tur a min tih avangin ka chawl a, ka kalna vel te chu ka sawi luam a. Ani chuan mual inang a tam thu te, a kal tawh tam tak tan pawh bo a awl thu te a sawi a. Ka hahdam deuh hnu chuan hawna tur a la thui bawk sia, kan inmangtha a. Zawi muangin ka haw chho ta a. Lo tawp ber vauah chuan tui a awm a, ka in zuai a. Thla pawh a lo eng tawh viau mai a, Lungsekawt tlang ka chuan chhuah chuan eng emaw tiriau hian ka lung a leng tlat mai! Chhun lama ka vahna ram chu ka thlir a, a reh vung vung a. Chu khamráng to lurh mai chungah chuan ka ding a, thla engin a bul vela thang (Hnim) nem han chhun te chu a mawiin a lunglen thlak  kher mai. Chutah chuan rei fe thlifim dawngin ka awm a, thil tam tak rilruah a lut a, ngaihtuahna a thlawk kual nasa khawp mai. Tun hnua ka ngaihtuah chhuah leh te hian kha zan anga ka lunglen kha sawi tur ka la hre miah lo!. A tawi zawngin kawng tluang vek a ni tawh bawk a, hmanhmawh em em lovin ka kal zel a, dar 9 velah in ka thleng a. Chhungten min lo ngaihtuah hman viau leh nghal a, a nuam vak lo. Ka inbual zo chu ka chau bawka ka mu nghal bawrh bawrh a…