BAWITLUNG HNAM CHANCHIN TLEM

Bawitlung hi Halkha hnam  Lai / Pawi chi peng pakhat a ni a. Lailun atang khawrua khawlu Zotlangah, chuta tangin tuna Halkha bial leh Thlantlang bialah an darh zau a. Hnam tam tak ah an in then a, Semthang, Lautu, Zophei, Fanai, Mara, Mie, Thaw etc… an ni. Heta tang hian hnam peng tam takah an inthen leh a, Chinzah, Zahnak, Hlawngchhing, Khenglawt, Zathang, Bawitlung , Chenhrang etc…te an ni. Mi huaisen hnam an ni.

Chin Hills lama  hnam hlawm lian berte chu  Zahthang, Chinzah, Zahau leh Bawitlung an ni a. Halkha rama Bawitlung chuan Duhlian tawng an hmang lova, tute emaw tan chuan mizo  dik tak  an ni lo. Mahse Mizoram a Bawitlung ho chu mizo inti tak an ni. Fanai leh Bawitlung ho tawng chu Halkha tlangdung tawng hi a ni a, Thlantlang lama Bawitlung ho pawhin Lai tawng an hmang vek zawk. Duhlian tawng hi zohnahthlak tehfungah a hman tlak loh a, Lai / Pawi hnam peng hrang hrang te hi mizo vek an ni. Chenna leh tlakna leilung a zirin tawng te chu a danglam thin, tawng chu tawng a ni a; hnam chu thisen siam a ni. Mizoram chhim lam Lawngtlai vel bawrah Chinzah, Zahthang leh Bawitlung te hi an hlawm tha a. Zirna in leh khawtualah Lai tawng aia duhlian tawng a lar zawk avang leh a pawimawh zawk avangin Lai tawng thiam lo an tam tawh viau a ni.

Pawi ho chuan chhipah sam an zial thin a, chu chu “ hrum ” an ti. Pawi tih aiin Lai tih hi an hmang hmasa zawk a, a lar zawk bawk. Pawi tih tawngkam lo chhuahna chu hetiang hian an sawi: Pi leh pu hun atang tawh a leido nei a inrun thin hnam kan ni a. Lai pasaltha ho hian raldo nikhuaah in vaupum nan leh insawiphurnan “ keimah Pawhte ” ( Lai tawng chuan keite tihna ) an hmang thin a, a awmzia chu “ keimah  keite ” tihna a ni. A lo hretute khan “ Pawite ’’ tiin an lo hre mai zawk a ni awm e, an mahni chuan Lai an inti.

Fanai pakhup hi Fanai zingah chuan upa ber niin an sawi a, Bawitlung hi Fanai unau zingah chhiar tel an ni a. Sawi leh hriat dan a inang lova, sawi dan chi khatah chuan Fanai in an awmpui an duat em em ania, Bawitlung tih a lo chhuahna pawh “ kan bawi a rawn tlung ” tih atang Bawitlung hi lo chhuak niin an sawi a. Heta “ bawi ” tih hi “ sal ” tihna an ti a. Mahse Bawitlung ho ve thung chuan an mahni hi fanai lal an ni a, a rawn haw kha “ kan bawi a ra tlung ” ( haw ) tihna a ni a. Lai tawngin bawi ( lal ), tlung ( haw ) tihna a ni a. A awmzia chu “ kan lal a lo haw ” tihna a ni. Chutiang chuan Bawitlung tih a lo ni an ti a, eng nge dik zawk hriat a har khawp mai. Eng pawh chu nise Fanai leh Bawitlung hi hnam in unau tha tak an ni.

Tin, Lai hnam zingah Hlawndo, Bawitlung, Tlumang leh Fanai te hian sakei hi sa serh ah an neih a. A zimna leh a aihnaah pawh an tel ve ngai lo. Keimi Hlawndawhthanga kha fanai thlahtu bulpui a ngaih a ni.